“Garaşsyz Watanymyz – ata-babalarymyzyň arzuw eden mekany” atly maslahat
“Garaşsyz, baky Bitarap Türkmenistan – bedew batly at-myradyň mekany” ýylynda, Türkmenistanyň Garaşsyzlygynyň 35 ýyllygy we Ylymlar güni mynasybetli, Türkmenistanyň Bilim ministrligi, Türkmenistanyň Saglygy goraýyş we derman senagaty ministrligi, Türkmenistanyň Demokratik partiýasy bilen bilelikde Arkadag, Aşgabat şäherleriniň we Ahal welaýatynyň orta hünär okuw mekdepleriniň arasynda, I.Gandi adyndaky Aşgabat lukmançylyk orta okuw mekdebiniň guramagynda 2026-njy ýylyň 12-nji iýunynda, Türkmenistanyň Jemgyýetçilik guramalarynyň merkezi binasynda umumy mežlisi we bölümlerde ugurlary boýunça “Garaşsyz Watanymyz – ata-babalarymyzyň arzuw eden mekany” atly okuw-usuly maslahaty geçirildi. Maslahatda çykyş edenler 2026-njy ýylyň 11-nji iýunynda Türkmenistanyň ýokary attestasiýa komitetiniň Prezidiumynyň Çözgüdine laýyklykda türkmen döwletiniň Baştutanyna häzirki zaman ylmyna goşýan uly goşandy, milli we bütin adamzat bähbitli ylmy- önümçilik, innowasion- senagat, durmuş - ykdysady, ylmy-tehniki özgertmeleri, parahatsöýüjilikli içeri we daşary syýasaty hem-de halkara hyzmatdaşlygynyň has-da giňeldilmegi üçin bitiren ägirt uly işleri nazara alnyp Türkmenistanyň Prezidentine syýasy ylymlaryň doktory Serdar Berdimuhamedowa Türkmenistanyň Ylymlar akademiýasynyň akademigi, ykdysady we syýasy hünärler boýunça professor alymlyk adynyň berilmegi mynasybetli we Ylymlar güni bilen tüýs ýürekden gutladylar. Maslahatyň çykyşlarynda ylym-bilimiň häzirki zaman özgertmeleri, sanly bilim ulgam we lukmançylyk ugurlarynda alnyp barylýan ylmy barlaglarynyň nazary we amaly taýdan utgaşdyrylmagynda möhüm ähmiýetleri, şeýle-de Gahryman Arkadagymyzyň we hormatly akademik, professor Prezidentimiz Arkadagly Gahryman Serdarymyzyň jöwher paýhasyndan döredilen eserleri, Türkmenistanyň Garaşsyzlyk syýasaty, 35 ýyl döwründe bilimde, saglygy goraýyşda, ykdysadyýetde, syýahatçylykda, oba hojalykda, medeniýet we sungatda gazanylan üstünlikleri wasp edildi we soňunda orta hünär okuw mekdepleriniň çeper höwesjeňleriniň aýdym-sazly baýramçylyk çykyşlary ýerine ýetirildi. Bölümçelerde çykyşlar dowam edildi. Halkara ähmiýetli we dünýä jemgyýetçiligi tarapyndan ykrar edilen beýik işleriň başynda durýan, ylmyň we tehnologiýalaryň gazananlaryny öňdebaryjy dünýä tejribesine ornaşdyrmakda beýik işleri durmuşa geçirýän Gahryman alym Arkadagymyzyň we alym Prezidentimiz Arkadagly Gahryman Serdarymyzyň janlarynyň sag, ömürleriniň uzak bolmagy, tutumly beýik işleriniň mundan beýläk hem has-da rowaçlyklara beslenmegi arzuw edildi.
