2024-nji ýylyň 17-nji oktýabrynda Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebiň «Parahatçylyk medeniýeti» atly ÝUNESKO klubunyň guramagynda Maddy däl medeni mirasyň halkara güni mynasybetli maslahat geçirildi. Oňa «Parahatçylyk medeniýeti» atly ÝUNESKO klubunyň agzalary gatnaşdylar. Maslahatyň gün tertibine laýyklykda, institutyň uly mugallymy Aýgözel Öwezowanyň tanyşdyrmagynda ÝUNESKO-nyň alyp barýan işleri, olaryň ähmiýeti dogrusynda giň maglumatlary öz içine alýan prezentasiýa görkezildi. Şeýle-de, ýaşlarda medeniýet, öz ýurtlarynyň däp-dessurlary, döredijilik we gözleg alyp barmak işlerinde tejribä eýe bolmak baradaky bilimleriň kemala gelmeginde ÝUNESKO klubunyň ähmiýeti, Türkmenistan bilen ÝUNESKO-nyň arasyndaky hyzmatdaşlygynyň esasy ugurlarynyň biri bolan bilim ulgamynda alnyp barylýan işler dogrusynda giňişleýin gürrüň berdi. Mundan başga-da, ÝUNESKO bilen bilim we ylym ulgamlarynda özara hereketleri giňeltmegiň çäklerinde Türkmenistanyň ýokary okuw mekdeplerinde ÝUNESKO kafedralarynyň, klublarynyň döredilmeginiň, ÝUNESKO-nyň mekdepler assosiasiýasyna ýurdumyzyň umumybilim berýän orta mekdepleriniň girizilmeginiň ähmiýeti barada nygtaldy. Maddy däl medeni mirasy goramak baradaky konwensiýa 2003-nji ýylyň 17-nji oktýabrynda medeni dürlüligi üpjün etmekde we durnukly ösüşi kepillendirmekde möhüm ähmiýete eýe bolan medeni mirasyň ähmiýetini göz öňüne tutulyp kabul edildi. Ýurdumyz bu konwensiýa 2011-nji ýylda goşuldy. Şol ýyldan bäri hem, Türkmenistan konwensiýanyň düzgünlerini ýerine ýetirmek boýunça halkara tagallalara işjeň gatnaşýar. Mälim bolşy ýaly, halkymyzyň kalbyndan dörän maddy däl gymmatlyklarymyz bu günki gün dünýä ýüzüni haýrana goýýar. ÝUNESKO-nyň Bütindünýä mirasynyň sanawyna biziň döwletimiz boýunça Gadymy Merw döwlet taryhy-medeni ýadygärlikler toplumy, Köneürgenç şäheri, Köne we Täze Nusaý galalary goşuldy. Şeýle-de, ÝUNESKO bilen hyzmatdaşlygyň çäginde «Görogly dessançylyk sungaty», Türkmenistan tarapyndan birnäçe Gündogar döwletleri bilen bilelikde hödürlenen «Nowruz baýramy», «Küştdepdi aýdym we tans dessury», «Türkmen milli halyçylyk sungaty», «Dutar ýasamak senetçiligi, dutarda saz çalmak we bagşyçylyk sungaty», «Türkmen keşdeçilik sungaty», «Ýüpekçilik we dokmaçylykda ýüpek önümçiliginiň däpleri», «Molla Ependiniň şorta sözlerini gürrüň berijilik däbi», ÝUNESKO-nyň «Adamzadyň maddy däl medeni mirasynyň görnükli nusgalarynyň sanawyna» goşuldy we umumadamzat gymmatlyklary hökmünde ykrar edildi. Ýakynda Aba Annaýew adyndaky Halkara atçylyk akademiýasyna «Ahalteke atçylyk sungaty we atlary bezemek däpleri» atly milli hödürnamanyň ÝUNESKO-nyň Adamzadyň maddy däl medeni mirasynyň sanawyna girizilendigi baradaky şahadatnamanyň gowşurylmagy dünýä ýaň salan türkmen ahalteke bedewleriniň halkara ykrarnamasyna öwrüldi. Maslahatyň ahyrynda oňa gatnaşyjylar ýurdumyzyň ylym-bilim ulgamyny pugtalandyrmakda, halkara guramalar bilen hyzmatdaşlygy ýygjamlaşdyrmakda uly tagallalar edýän türkmen halkynyň Milli Lideri Gahryman Arkadagymyza, Arkadagly Gahryman Serdarymyza çäksiz hoşallyklaryny beýan etdiler.
